هذه القصيدة هدية الى روح الشهيدة كوثر التي لقيت ربها يوم .
.
24.
1.
2016
كلمة بسم الله تفتح كل صعيب * * * وجميع اللي صاعبة بيها تسهال
ساروت ومفتاح من عاقل لبيب * * * تفتحله كل بيبان الاعمال
جميع العقبات بيها تطيح تريب * * * غي سمي بالله تتخطى لجبال
وصلي يا ربي على طه الحبيب * * * والسلام على احمد زين الخصال
* * * * * * * * * * * * * * * * * * * * * * * * * * * * * * *
التزمت الصمت وبقيت طرف الدرب * * * فجميع اللي صار نحدق بلبصار
استرحت ودرت راحت محارب * * * بعد ما حربنا حطت لوزار
سيف المدح ما لقاشي ما يضرب * * * سيف الهجاء زيرتو تزيار
مسحتو وغسلتو من دم المذيب * * * دسيتو فالغمد علقتو فالدار
نعرفه ماضي يضرب ويعيب * * * من حوم عليه يمحي لو لاثار
عشاقين الفن عليه اتقلب * * * و يسالو بحوصي كاين شي اشعار
خداعين لوطن جاتهم على القلب * * * بياعين الدين باعوه بالدينار
منهم اتهنيت ما نبقى نكتب * * * وما نبقاش اليوم نكتب ذو لشعار
لكن امر الله كي راد يسبب * * * يتمشى ذالكون كي شائت لقدار
يوم الحد مشيت خارج نتهبب * * * في عشوية جيت خارج من الدار
قاصد من صحابي عز الصاحب * * *مفتاح صديق صادق من لخيار
خرجنا ومشينا في قبل المغرب * * * نتساراو جميع ونعيدو لخبار
حتى شفنا امر يحير ما يعجب * * * والناس تغوت عند الصبيطار
سولت سليمان لاكان يجاوب * * * يا ترى ذالامر خبرني كي صار
جاوبني فالحين وجهو مظطرب * * * هاذي طفلة تيمها جرار
تحتضر وتموت في احضان الاب * * * لا طبيبة لا طبيب ينقدو لعمار
لا اسعاف تجيه وفيها يركب * * * لا ممرضة تشوف للطفلة كي صار
ربع سوايع فاتت بوها يترقب * * * يستنى فالغيث طال الانتظار
يستنجد يجري يبكي ويقلب * * * من فيكم يغيث يا هاذ الحضار
ماتت مسكينة وهي تتعذب * * * تترجى فالخير لا من فيها حار
تترجى فالخير ملي ما عندو قلب * * * واش الصم يحير فالواد الهرهار
ماتت كوثر بين لعشا والمغرب * * * مستشفى العيون مهجور وقفار
* * * * * * * * * * * * * * * * * * * * * * * * * * *
يا سيد الوزير
يا سيد الوزير انت فيك العيب * * * واش المشفى يصد بيبانه بنهار
المشفى يكون فيه دوا وطبيب * * * ولا المشفى يكون مهجور وقفار
فالمشفى تكون الات التطبيب * * * ولا المشفى يكون غي طوبة وحجار
والاسعاف تكون غي تدي وتجيب * * * ولا بالعام ادير الروطار
يا سيد الوزير
فالمشفى يكون طبيب التطبيب * * * ولا فيه يكون الفار والصرصار
فالمشفى يكون الاداب والترحيب * * * ولا فيه يكون العنف والتكبار
والممرضة تكون تعالج كل عطيب * * * ولا فيه تكون تصبغ في لظفار
والاسعاف تحلب فالشعب حليب * * * خلص المازوت ولا شد الكار
يا سيد الوزير
يا سيد الوزير هاذ الأمر غريب * * * اجي تشوف الشي لي عمرو ما صار
هذا مشفى ولا سجن ابو غريب * * * يداوي ولا يعذب فالبشار
هذا طبيب درتوه للفحص والتطبيب * * * ولا سجن بنيتوه يقضي عل لعمار
وكلنا ربي عل اللي كان طليب * * * ياخذ الحق عادل وغفار
ونختم كلامي بصلاة الحبيب * * * احمد الرسول طه بولنوار
يا ربي ترحم كوثر يا يامجيب * * * وتصبر مسكين باباها عمار
بقلم: الشاعر عبدالله بحوصي البوشيخي