لي ربّاني… ربّاك
وصلني كلامك و فهمت لغاك.
.
.
حتى لو أنا ماشي معاك
المعنى فحروفك واضح من هناك
ما قلتي عيب ما حطيتي لوم حداك
الوطن لي رباني حتى نتا رباك
علاش أنا رحلت؟.
.
.
و ظليتِ حدا مّك و بّاك
لكن المكتوب لازم تشوفو عيناك
و رب الكون كما كاين هنا، كاين هناك
يا مول خيوط الرتيلة كم من خيط صدق معاك؟
خيوطي ذابلة لكن فالشدة تلقاها معاك
كلامك جميل و الشعر بحروفو واتاك
ما عندي ما نقول غير سلمت يمناك
قضيت الغالي من عمري فصحاري و فلاك
شكون الكذاب لي قال نسا الهم ينساك
بلادك.
.
.
همك.
.
.
لو تنساها ما ظني تنساك
تضل فدمك حتى لو الموت دّاك
رجوعك ليها أكيد و منها ما انت مفاك
شرفها تشرفك و تشرف قبيلتك معاك
ناديت يا خالد و آني لبيت نداك
بكلمة طيها سلامي لكل المغاربة لي معاك
و تحية حب للي ربّاني و ربّاك