طْمَعْ الدنيا
فْتّْتْ البَرْقْ
فْقْلُبْ الخَلْقْ
قُلْتْ،يْمْكْنْ
الحب ،فيهم ،
يْوْلّي أَعْمَقْ
صْرّْفْتُه نْجومْ
نْزْلْتْ ،نْخْلَاتْ
عْرُوقْهَا
سَابْقا تَاجْهَا
شَقَّتْ الأرض
زْلزْلَاتْ الظّْلامْ
دْوَا الرَّعْدْ
خَافْ الغْمَالْ
من قْشُورُه
لَنُورْ البْرْقْ
يْفْضَحْ لُونُه
وْ رِيحْتُه
تْغُمْ النّْفُوسْ
وّْطّْيْرْ
بَرَكْتْ المْكَانْ
تْمْنِّيتْ
نُورْ البْرْقْ
يْهَوِّي المْغَارة
إلِّي فِينَا
من جُوفْ الّليل
تَّفْتَحْ بِيبَانْ
نْصَالْحُو
الغْضْبَانْ
إِلَّي فِيكْ وْ فِيا
نْكسِيوْ
العْرْيَانْ من آدَمَيْتُه
كان وْ كُنَّا
وْ رَجْعَاتْ
للزّْمانْ حكايْتُه
بَنِي آدَمْ
مَا بْغَا يْتْعَلّْمْ
تْقُولْ
عَجْبُو يْتتْأَلّْمْ
فْتَقْتْ الحُبْ
بْغِيتْ نْفْصْلُه
من جْديد،
يا خْسَارة
بَابُه
وْلّاتْ من حْدِيدْ
وْمْفْتَاحُه
من كاسْ صْدِيدْ
حَوّاء
كْلَاتْ النّقمة
في السّْمَاء
وْ آدَمْ
حْرْقْ الغَلَّة
في الأرض
آشْ نْقولو غْدَّا
لْ رَبّْ السّْمَا
أَشْنُو دَرْنَا
فْداكْ النّعْمَة
ش
طْمْعْ فْ الخِير
وْ شِ كْلاَ
فْمْلْكْ الغِيرْ
مَا عْرْفْتْ
نْشْكِي
مَا عْرْفْتْ
نْبْكي
عْلَى حَالْ
غِ البارح
كان
من المُحَالْ