خاليد جموحي يكتب: ما بغيت دجاجة … بالبيضة نقضي حاجة
مابغيت الدجاجة .
.
.
كنت بالبيضة حاب نقضي حاجة .
.
.
نرضى بالنص، مانوض عجاجة .
.
.
مانزطم على زاجة .
.
.
نواجه فلوس
عيب نسبقو لفلوس
ولا نحكو فانوس
مانحتاجو لجاسوس
الكلمة من الرجال لرجال
والشمتة توقعها من النسا وخا تكون فهمهم حمال
ماتسحر، ماترجع بسمهم دجال
والله حتى تهرب وتولي فحياتك رحال
مابغيت الدجاجة .
.
.
كنت بالبيضة حاب نقضي حاجة .
.
.
نرضى بالنص، مانوض عجاجة .
.
.
مانزطم على زاجة .
.
.
حياتي حريفات
ماشي مال وعريفات
ما نجمعهم رزمة ولفيفات
نعيش بمحبة الناس، وثمارها فقفيفات
بسوايعي مرتاح و راضي
ناشط مانطج مانهز غراضي
مانحلف مانوقف قدام قاضي
مانتخدع مانقول: هاذي مرتي، راني ناضي
الغراب ما علمنا
ومن الهدهد ما استفدنا
نبغيو كولشي لينا
نسينا كولشي يتزمم علينا
كل خيمة وحمارها
وكل مكحلة وعمارها
وكل قافلة وكوادها
وكل جلسة و روادها
أنا !! لي خطأت الإختيار
أنا !! لي بغيت نرجع الإعتبار
مانتسرع فالقرار
مانطيح فالتكرار
درويش وراسي لفوق
مجروح و مانمسح دموعي فالخروق
ماتهمني خدودي و وجهي المحروق
النفس حارة، وتجري فالعروق
وقفت البيضة فالطاس
وشربت الهوى فالكاس
ماغرقت ، ماعتقني غطاس
ماسكني وسواس
أنا ماتهمني الدنيا
ما تغريني نتيا
ربي لي عالم بلي تحلا ليا
وبمكتابي ولي مخبي ليا
مابغيت الدجاجة .
.
.
كنت بالبيضة حاب نقضي حاجة .
.
.
نرضى بالنص، مانوض عجاجة .
.
.
مانزطم على زاجة .
.
.
اعصاب باردة
واحلام مقادة
وفدادن محادا
وعقول شاردا
رمانة مغمضة
حامضة محمضة
هي معايا محاربا
وخلات جوارحي مضاربا
مابغيت دجاجة .
.
.
بالبيضة نقضي حاجة.