آجي يا ولدي وقول ليا … :
…ما تحشم وغير شرح ليا
آشنوا بينك وبين ديك الشجرة …؟
مالك تحاكيها كيف المرأة …
هذه دقايق وأنت تبكي … عليها…
… شكون يا ولدي … لي خلاك تجي ليها…
آجي يا ولدي و قول ليا…:
فين ضحكات ديك لعشية…؟
عفاك آميمتي … ماضغطي عليا … ما نظنش تشفاي فيا…
… وخا هي غير شجرة
تشهد لي كيف كانت النظرة…
وتعرف كيف تلاقينا…
وعلاش تناسينا…
….
فواحد النهار … كنت نرجف او منهار
وعقلي مرة معايا ومرة محتار …
ميعادنا تحت أغصان وأوراق هاد الشجرة
آش نقول :…كيف نعبر كيف نقرا …
لحروف لي فقلبي … والهضرة…
وراكي …آميمتي عارفة المرأة غير إمرأة…
تبغي بضاض والكلام حلوا … والنظرة .
.
وهذا لي خلاني نشكر الشجرة …
في حكايتنا … وكيف تلاقينا …
أو ما نخبي عليك … الخبز حار …
ويبعدك على الدار … واخا أنت ما تختار…
ولاحني … في بلاد تبعد سوايع كثار …
وليوم … آه ليوم …
برجوعتي لمكان …
وخا طال الزمان … ورجعت ليها نيشان…
وصراحة كنت محضر الإيمان …
لكن خيالها ما يبان …
تصدمت بالشجرة كبرات وخرفات …
وصورتي من ذكرياتها تمحات.
.
هذا لي خلاني نحاكيها …
وبوحشي نرويها …ونسولها … على الأحباب
راه مقصودي ما يتعاب …
وعيبي ما زممت غرامي في الكتاب …
حتى يا ميمتي … وليت اليوم بضعة …
وتقلبات عليا البردعة .
.
يا وليدي البردعة ما تقلبات …
سول وسقسي ما تقدرش تكون نسات …
أو فغرامك وكلامك سمحات …
ومن غيرك حبات … لي فهمت من كلامك .
.
راه بفراقك تقلقات
و موحال تكون كرهات
آميمتي حروفك حروفها … وشوفتك شوفتها …
ورزانتها .
.
وكلامها و التسبيلة تسبيلتها
آش من سر عندك ؟؟
آلميمة نرجف كيف كنت نرجف لها…؟؟
نرجف كيف كنت نرجف لها…؟؟
ولا… ولا وغير قول ليا …:
ما تحشم وفسر ليا…
حتى من خيمتنا هجرتها …
أوما نعيش غير قدام هاد الشجرة
لي همستي ليها بضعف النبرة …
بلاما تحكي …
القصة ملكي …
ماقدرت ننساك
وكنت عارفة لقياك …
… غير آجي … راك آنا لي خليتها …
و أيامي لي قتلتيها … دبا … دبا نموت فرحانة
بسهامك لي فقلبي غرزتيها …
آجي يا … المسافر أنا لي كنت تبغيها …
البردعة ما تقلبات كيف خليتها لقيتيها …