غير تهنا ياولد الناس
شد رحالك و شريها.
.
.
قلبي ما بقا لك عساس
عرفتها قبل ما تنويها
خرج من حياتي نولّي لاباس
و صفحتك غادي نطويها
نتهنا من صداع الراس
و ديك الذكرى نمحيها
عمرتِ حياتي بالوسواس
ولّيت نفسي شاكّ فيها
الحمد لله ما عليا باس
و ناري بدموعي نطفيها.
.
.
جمع راسك راك باقي.
.
.
ما عرفتِ مع من نتا
لو كنتِ لحرثي ساقي
ما نزرع فيه حتى نبتة
سوّل الساحر و الراقي
يكون ذكر و لا نتا
لي كيفرّق و يلاقي
هو ربي ماشي نتا
ما لقيتك ليا شاقي
ما نزّلتٍ عليا الشتا.
.
.
علاش نزيدك لصداعي
و أنا لي فيا كافيني
مكتحشم مكتراعي
غير شريه و هنيني
ديما معبس بلا داعي
وفعز الفرحة تبكّيني
أنا حسبتك زعما دراعي
و فعز المحنة تخليني؟!.
.
.
غير سير راني داعي.
.
.
ربي الكريم يقوّيني
تواضعت معاك و تكبرتِ
باش من حق تتعالا
نتا و ليّام عليا جرتِ
بعد ما كنت لك حمالة
شحال من فرصة ضيعتِ
و كنت عليها عوّالة
ملي بالغدر.
.
.
تّبليتِ
معاك حالتي ولات حالة
ما حشمتِ ما راعيتِ
آش طلعك من المسألة
دابا كنقول لك شريها
ما بقيتِش عندي غالي
و العشرة الله يهنيها
سير خليني في حالي
خود الدنيا و ما فيها
و خلي لي راحة بالي
و ما تبقاش نتا فيها
يكون خْيَرْ ما جرالي
و نزيد نقول لك شريها
عاد نحقق لي فبالي.
.
.
ما بقيتِش عندي غالي
سير خليني في حالي