عن الشيعر ههه !
يحيا انير
مقال بالدارجة
راه أي واحد فهاد الدنيا يقدر يكتب الشيعر؛ غير هو خاص شي لوازم وضروريات مهمة لهادشي :
– أولا : شي بنت زوينة ورشيقة وغزالة بزاف بزاف باش تفيق الإلهام ديالك للأبد.
– ثانيا : ورقة بيضة مامسطراش وتكون قابلة للطي ( كاتلعب الفول كونطاكط ).
– ثالثا : ستيلو عادي ( حسن يكون كحل ) واخا تكون غير سارقو من شي مقلمة.
– رابعا : تبعد على كحل الراس باش ما يبداش يعلق عليك ويقول ليك مثلا : ” واو وليتي شاعر ! هي بديتي كاتحب !!! “.
خامسا وأخيرا ( وضروري ) : تحضر شي أمسية شعرية وتلقي فيها قصيدتك، باش تشوفك فاتي فلوغ وتبادل معاك المعلومات ديالها بصدد تولي هي فارسة أحلامك بعدما قررتي تنسى زوبيدة اللي دخلاتك لعالم الشعر ( يا ولد الحرام ).
واتا نوض تسرح أبو ركابي، واش تيقتي هادشي ههههه، وا والله وما عطاك ربي الموهبة من نعومة أظافرك يما طفرو واخا تقرا جميع مجلدات الكون.
قال ليه شنو ندير باش نقنع حبيبتي ؟ جاوبو : كتب ليها الشيعر هههه، لواه الشعرية يا راس الطارو، بوقال نتا، وجهك صحيح فيه الفرانات ديال الطيارة هههه.
على سبيل المثال كتب قصيدته كالتالي :
” أنت قمري يا عمري،
ليلنا يحسدنا،
ونهارنا يهجرنا،
أحبك حتى الموت،
وا قلباه،
أنت حياتي “
هههههههههههههههه
هادي راه شذرة ديالي، عاد كتبتها، الموهيم اللي بغاها باش يبان على حبيبتو أنه شاعير غير يديها راني مسامحو دنيا وآخرة ومنين طلب منو المزيد يضرب راسو مع اللغة والورقة والستيلو باش يثبت أنه شاريع، عفوا شاعير.
حقيقة وللأمانة فقط كثروا الشعراء والشاعرات وفسد الشعر وعذب الكلام.
الحاصول الله يرفق بالكلمة الصادقة والإحساس المرهف، أما دابا راه كاين غير الكذوب والنفاق، والمصلحة الخبيثة، على وزن الجمرة الخبيثة ههههه.
نصيحتي مجددا لي ولكم، كتبو الشيعر بالقاعيدة، وما تنساوش باللي راه الثومة كثار صحابها ولكن حب الملوك قلال صحابو حيث قليل، والحاجة القليلة ديما مضمونة الجودة، هكذا الشعر يا أحبائي.
.
.
ولتصحيح معلومة معينة، الشيعر ماشي بالضبط هو البحور الخليلية والتزواق المبالغ فيه واستعمال معجم صعب وقوي ونادر في الكتابة باش يميز الشاعير راسو على عامة الشعراء، لا، ولكن الشيعر هو كلام زوين، أنيق، بسيط، مدقق وموزون بالحكمة والموعظة والعبرة ومحبوب عند أي واحد إقراه من القراءة الأولى.
.
.
تذكروا، أكتبوا شعرا لعلكم تفلحون يا أولي الأقلام الصادقة.
مودتي لجميع الأدباء.
______________
يحيا انير
مدينة أسا.