الملحة دودت

ليلى البصري

أجي يا نفسي
 خبريني و قولي ليا
واش الوقت تبدلت
 ولا  قلالت النية
لي تحسبو خاك
 يجري لك فالردية
و يتمنى لو  يشوفك
فحفرة منسية
و يحسدك…
حتى  على الضلعة المثنية

هاد الوقت…
 كلشي خو راسو
عم راسو…
خال راسو…
لا تقول لي عمتي…
و لا مّي هنية
خالتك!..  
فالخلا خلاّتك…
و عمتك!..  ب
العما نفاتك…
و خاك…
 لي هو خاك…
 شافك فالهم و فاتك…
علاش تبكي على نباتك؟..
و تسلم للصمت غواتك…
خذها كمّا جاتك…
و قبل من الدنيا ما عطاتك
و خلي فالمولى…  رجاتك
و لا تنسى  يوم فناتك

تمنيت نعرف!
 آش من ذنب جنيت؟
تغير لوني…
و بالحزن تبليت
من جور الحباب
قاسيت و مليت
لا ذنب جنيتو
ولا فحقهم خطيت
يشهد الله كم قاسيت
 و عانيت
و ملي قلت نرتاح…
 فالقنت ترميت
و صار وجودي
بحال عدمو فالبيت  

إذا اليوم جفاك القريب
و خوك صار لك ربيب
و بقيتي فالدنيا غريب
وَكّلْ أمرك للحسيب
و خلي المولى لك حبيب
و تأكد أنه سامع… و مجيب

وكلتك يا ربي أمري
يا العالم سري و جهري
و طول بالي و صبري
و نواحي فليلي و فجري
وخّا القريب سعا فنحري
عندك ما يضيع أجري
وكلتك يا ربي أمري

تعليقات الزوار
جاري تحميل التعاليق...

شاهد أيضا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على هذا ، ولكن يمكنك إلغاء الاشتراك إذا كنت ترغب في ذلك. موافقالمزيد