شكون لي ما يعرف مولاي علي… جد الجدود
لي قبرو فالصحرا موجود…
سولو التاريخ… الممدود
لي فيه نتوما لحود
دامها قضية وجود
شكون حاس بشي حدود
رجّعناها من شحال هادي
على عينك يا البادي
كانت صحرا ولات جرادي
بفضل ربي و جهد بلادي
موت بغيظك يا العادي
الصحرا ديالنا مشحال هاذي
هكذا علموني جدادي
بعروقنا زرعناها، و بدمنا رويناها
و بجهد الله… للتاريخ دخّلناها
رجّعناها… و بنيناها و عمرناها
و طمع فيها كل غريب… وقالك سلبناها
خلاوها تبكي على لي بحياتو فداها
و تتمنى… لو العالي دوّاها
و تلعن لي فهاد الحالة خلاها
ما حشم ما راعا… ما عطا للجيرة وتاها
كلمة من السادس… للتاريخ خلاها
الصحرا ديالنا حتى تقوم الدنيا لمولاها
*************************
المغرب للكل … لو الروح فنات
الجار يضل جار حتى لو على بلادي جاير
وجور جاري… جاير ماشي كما الجراير
شوف الجنوب كيف ولّات…
ياك كانت غير صحراري و فلاة
و أرضها من الما شحات…
بفضل الله، ثم العلوي، وحنا… زوهرات
صبحت جنة… و ذرات رملها نبتات
و دارت الظلال و على قلوب العدا وقفات
ياك نبينا وصى على سابع جار
مال جارنا و غيرو محتار
و المغرب أبدْ ما صرّف فيهم العار
قايدنا شهم… و لد شرفاء أخيار
كل ما قالو: آي… صار لغوثهم طيار
الجار يظل جار… حتى لو عليا جار
يشوف حالو من جورو على جارو… كيف صار
علْ و عسى يتعظ… عار الجار على الجار
و يصحح مسارو و ما تخلط ليه من أفكار
الصحرا ديالنا و المغاربة شعب مغوار
ما يفرطو فشبر منها لو يتبعو اللفعة للغار
المغرب كريم و بجارو رحيم… ماهموه حفاير
ما هموه حساد ما هموه حقاد… للقدام ساير
بغاو و لا كرهو، ما يخالف …
فضل الله بينا ضاير
نبقاو خشبة فحلق العدا لو دّور الدواير
المغرب ديال الكل… ماشي غير شي فئات
على ربي تحشم شي حكومات
و تسمع شنو قال زين الكلمات
تنفذ كلامو و تتبع الخطوات
تهنينا من دوك العينات
لي قننو الرشوة و دارو كل الموبقات
راه الغصة فينا حتى للممات
و المغرب للكل… لو الروح فنات
بقلم الكاتبة والشاعرة المغربية : ليلى البصري