أجي يا نفسي خبريني و قولي ليا
واش الوقت تبدلات ولا قلالت النية
لي تحسبو خاك يجري لك فالردية
و يتمنى لو يشوفك فحفرة منسية
يحسدك حتى على الضلعة المثنية
…
هاد الوقت… كلشي خو راسو
عم راسو…
خال راسو…
لا تقول لي عمتي… و لا مّي هنية
خالتك!.. فالخلا خلاّتك…
و عمتك!.. بالعما نفاتك…
و خاك… لي تحسبو خاك… شافك فالهم و فاتك…
علاش تبكي على نباتك؟..
و تسلم للصمت غواتك…
خذها كمّا جاتك…
و قبل من الدنيا ما عطاتك
و خلي فالمولى… رجاتك
و لا تنسى يوم فناتك
…
تمنيت نعرف آش من ذنب جنيت
تغير لوني… و بالحزن تبليت
من جور الحباب قاسيت و مليت
لا ذنب جنيتو ولا فحقهم خطيت
يشهد الله كم قاسيت و عانيت
و ملي قلت نرتاح، فالقنت ترميت
و صار وجودي بحال عدمو فالبيت
…
إذا اليوم جفاك القريب
و خوك صار لك ربيب
و بقيتي فالدنيا غريب
وَكّلْ أمرك للحسيب
و خلي المولى لك حبيب
و تأكد أنه سميع… مجيب
…
وكلتك يا ربي أمري
يا العالم سري و جهري
و طول بالي و صبري
و نواحي فليلي و فجري
وخّا القريب سعا فنحري
عندك ما يضيع أجري
وكلتك يا ربي أمري